AP Political News: సొంత ఊరు వదిలి, కన్నవారికి దూరంగా వచ్చి నగరాల్లో ఉద్యోగాలు చేస్తున్న మహిళలకు ఆంధ్రప్రదేశ్ ప్రభుత్వం ఒక తియ్యని కబురు అందించింది. పట్టణాల్లో ఉంటూ ప్రైవేటు హాస్టళ్లలో వేలాది రూపాయలు కుమ్మరించలేక, సరైన భద్రత లేక ఇబ్బందులు పడుతున్న వర్కింగ్ ఉమెన్స్ కోసం “సఖి నివాస్” పేరుతో సరికొత్త వసతి గృహాలను అందుబాటులోకి తీసుకురావాలని చంద్రబాబు సర్కార్ నిర్ణయించింది.
చదువు పూర్తయ్యాక మంచి కెరీర్ కోసం విశాఖపట్నం, విజయవాడ, గుంటూరు వంటి పెద్ద నగరాలకు వచ్చే యువతులు, మహిళలు ఎదుర్కొనే ప్రధాన సమస్య వసతి. ప్రైవేట్ హాస్టళ్లలో ఫీజులు ఆకాశాన్ని తాకుతుండగా, కనీస సౌకర్యాలు కూడా ఉండటం లేదనే ఫిర్యాదులు మెండుగా ఉన్నాయి. ఈ క్రమంలో మహిళా లోకానికి అండగా నిలిచేందుకు ప్రభుత్వం రాష్ట్రవ్యాప్తంగా సుమారు 30 వర్కింగ్ ఉమెన్స్ హాస్టళ్లను నిర్మించబోతోంది. దీనికి సంబంధించి మహిళా, శిశు సంక్షేమ శాఖ ఇప్పటికే అధికారిక ఉత్తర్వులు జారీ చేసింది.
ప్రభుత్వం ఏర్పాటు చేయబోయే ఈ వసతి గృహాలు కేవలం గదులకే పరిమితం కాకుండా, కార్పొరేట్ స్థాయిలో భద్రతను కూడా కల్పించనున్నాయి.
నిర్వహణ: ప్రతి హాస్టల్లో సుమారు 30 మంది మహిళలకు చోటు కల్పిస్తారు.
సిబ్బంది: హాస్టల్ బాధ్యతలను చూసుకోవడానికి ఒక మేనేజర్, వార్డెన్ ఉంటారు. వీరికి తోడుగా ముగ్గురు కేర్ టేకర్లు నిరంతరం అందుబాటులో ఉంటారు.
భద్రత: మహిళల రక్షణ కోసం ప్రత్యేకంగా ఒక సెక్యూరిటీ గార్డుతో పాటు, రాత్రి వేళల్లో పహారా కాయడానికి ముగ్గురు నైట్ గార్డులను నియమించనున్నారు.
బడ్జెట్: ఈ ప్రాజెక్టు కోసం ప్రభుత్వం భారీగానే ఖర్చు చేస్తోంది. ఒక్కో హాస్టల్ నిర్వహణకే ఏడాదికి సుమారు రూ. 10.8 లక్షలు ఖర్చు అవుతుందని అంచనా.
ఈ సఖి నివాస్లు కేవలం ప్రభుత్వ ఉద్యోగులకు మాత్రమే కాదు, ప్రైవేటు కంపెనీల్లో పని చేసే మహిళలకు, సాఫ్ట్వేర్ ఇంజనీర్లకు ఉన్నత చదువుల కోసం నగరాలకు వచ్చే విద్యార్థినులకు కూడా అందుబాటులో ఉంటాయి. మార్కెట్ ధరలతో పోలిస్తే చాలా తక్కువ ధరకే నాణ్యమైన భోజనం, సురక్షితమైన గది లభించనుండటంతో మధ్యతరగతి మహిళలకు ఇది పెద్ద వరంగా మారనుంది.
ప్రస్తుతానికి 30 ప్రాంతాల్లో వీటిని ప్రారంభించాలని భావిస్తున్న ప్రభుత్వం, భవిష్యత్తులో డిమాండ్ను బట్టి వీటి సంఖ్యను మరింత పెంచే అవకాశం ఉంది. మొత్తానికి ఏపీ ప్రభుత్వం తీసుకున్న ఈ నిర్ణయంపై మహిళా లోకం హర్షం వ్యక్తం చేస్తోంది. “ఇకపై నగరాల్లో ఉండాలంటే భయం లేదు.. సఖి నివాస్ మాకు కొండంత భరోసా” అని సంబరపడుతున్నారు.
