తెలంగాణలోని ప్రభుత్వ పాఠశాలకు జూనియర్ కళాశాలల్లో చదివే విద్యార్థుల కోసం రాష్ట్ర ప్రభుత్వం ఒక అద్భుతమైన నిర్ణయాన్ని తీసుకుంది. విద్యార్థుల శారీరక దృఢత్వం, మెరుగైన ఆరోగ్యాన్ని దృష్టిలో ఉంచుకుని, వచ్చే విద్యా సంవత్సరం (2026-27) నుండి పాఠశాలల్లో పౌష్టికాహార పంపిణీని మరింత విస్తృతం చేయాలని నిశ్చయించింది.
ముఖ్యమంత్రి సమీక్షలో కీలక నిర్ణయం
ఇటీవల విద్యాశాఖపై ముఖ్యమంత్రి రేవంత్ రెడ్డి నిర్వహించిన ఉన్నత స్థాయి సమీక్షా సమావేశంలో ఈ మార్పులకు శ్రీకారం చుట్టారు. కేవలం మధ్యాహ్న భోజనానికే పరిమితం కాకుండా, ఉదయం పూట కూడా విద్యార్థులకు పోషక విలువలతో కూడిన ఆహారం అందించాలని ప్రభుత్వం భావిస్తోంది. దీనివల్ల సుమారు 19 లక్షల మంది విద్యార్థులకు నేరుగా ప్రయోజనం చేకూరనుంది.
రాగి జావతో పాటు పాల పంపిణీ
ప్రస్తుతం అమలులో ఉన్న పథకం ప్రకారం విద్యార్థులకు వారానికి మూడు రోజుల పాటు రాగి జావ అందిస్తున్నారు. అయితే, మిగిలిన మూడు రోజులు కూడా ఖాళీగా ఉంచకుండా, పిల్లలకు వేడి పాలు (Milk) పంపిణీ చేయాలని విద్యాశాఖ ప్రతిపాదించింది. దీనివల్ల విద్యార్థుల్లో కాల్షియం లోపం తలెత్తకుండా, ఎదుగుదల బాగుంటుందని అధికారులు విశ్లేషిస్తున్నారు.
జూనియర్ కాలేజీల్లోనూ అల్పాహార పథకం
ఈ పథకాన్ని కేవలం ప్రాథమిక, ఉన్నత పాఠశాలలకే కాకుండా, రాష్ట్రంలోని 430 ప్రభుత్వ జూనియర్ కళాశాలలకు కూడా వర్తింపజేయాలని ప్రభుత్వం నిర్ణయించింది. రాష్ట్రవ్యాప్తంగా దాదాపు 1.80 లక్షల మంది ఇంటర్మీడియట్ విద్యార్థులు ఈ నిర్ణయం వల్ల లాభపడనున్నారు. గ్రామీణ ప్రాంతాల నుండి వచ్చే విద్యార్థులు ఉదయాన్నే అల్పాహారం తీసుకోకుండా తరగతులకు హాజరవుతున్న నేపథ్యంలో, వారికి కాలేజీలోనే బ్రేక్ఫాస్ట్ అందించడం ద్వారా చదువుపై మరింత ఏకాగ్రత పెంచవచ్చని సర్కార్ భావిస్తోంది.
ఆరోగ్య లక్ష్మి ద్వారా అంగన్వాడీల బలోపేతం
స్కూల్ పిల్లలతో పాటు అంగన్వాడీ కేంద్రాల్లో కూడా మార్పులు చోటుచేసుకోనున్నాయి. గర్భిణులు, బాలింతలు ఆరేళ్ల లోపు చిన్నారులకు ‘ఆరోగ్య లక్ష్మి’ పథకం కింద ప్రతిరోజూ గుడ్లు, పాలు భోజనాన్ని ప్రభుత్వం అందిస్తోంది. అంగన్వాడీలను త్వరలోనే ‘ప్రీ-స్కూల్స్’గా మార్చాలని చూస్తున్న ప్రభుత్వం, తద్వారా విద్యార్థుల ప్రాథమిక పునాదిని పటిష్టం చేయాలని లక్ష్యంగా పెట్టుకుంది.
