మధ్యప్రాచ్యంలో మరోసారి యుద్ధ భయం పట్టుకుంది. ఇరాన్తో సాగుతున్న అణు చర్చలు ఒకవేళ విఫలమైతే, ఆ ప్రాంతంలో భారీ ఎత్తున సైనిక ఘర్షణ తలెత్తే ప్రమాదం ఉందని అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. శనివారం మీడియా ప్రతినిధులతో మాట్లాడిన ఆయన, ఇరాన్ మొండివైఖరి వల్ల పరిస్థితి చేయి దాటిపోయే అవకాశం ఉందని పరోక్షంగా హెచ్చరించారు.
ప్రస్తుతం జెనీవాలో అమెరికా, ఇరాన్ అధికారుల మధ్య కీలక చర్చలు జరుగుతున్నాయి. అయితే, ఈ చర్చల్లో ఇప్పటివరకు ఎలాంటి పురోగతి లభించకపోవడం గమనార్హం. “ఇరాన్ చిత్తశుద్ధితో చర్చలకు వస్తే బాగుంటుంది, కానీ ప్రస్తుతానికి ఆ సంకేతాలు కనిపించడం లేదు” అని ట్రంప్ వ్యాఖ్యానించారు. ఇరాన్ ఎట్టి పరిస్థితుల్లోనూ అణు ఆయుధాలను తయారు చేయకూడదన్నదే తమ ప్రధాన లక్ష్యమని ఆయన స్పష్టం చేశారు. దీనికోసం అవసరమైతే సైనిక చర్యకు కూడా వెనుకాడబోమని వాషింగ్టన్ వర్గాలు సంకేతాలిస్తున్నాయి.
మరోవైపు, ఇరాన్ చుట్టుపక్కల ప్రాంతాల్లో అమెరికా తన సైనిక శక్తిని అసాధారణంగా పెంచేసింది. గత రెండు దశాబ్దాల్లో ఎన్నడూ లేని విధంగా, అంటే దాదాపు 2003 నాటి ఇరాక్ యుద్ధ సమయం నాటి స్థాయిలో బలగాల మోహరింపు జరుగుతోంది. ఇది కేవలం హెచ్చరిక మాత్రమేనా లేక యుద్ధానికి సన్నద్ధమా అన్నది ఇప్పుడు ప్రపంచ దేశాల్లో ఉత్కంఠ రేపుతోంది.
పరిస్థితి తీవ్రతను గమనించిన పలు దేశాలు అప్రమత్తమయ్యాయి. జెరూసలేంలోని అమెరికా రాయబార కార్యాలయం తమ సిబ్బందిని వెనక్కి పిలిపించుకోగా, బ్రిటన్, చైనా, భారత్ వంటి దేశాలు కూడా తమ పౌరులకు ట్రావెల్ అడ్వైజరీ జారీ చేశాయి. మధ్యప్రాచ్యంలోని ఉద్రిక్త ప్రాంతాల నుంచి తక్షణమే తప్పుకోవాలని ఆయా దేశాలు తమ దౌత్యవేత్తలకు, పౌరులకు సూచించాయి.
గత జూన్లో ఇజ్రాయెల్, అమెరికా జరిపిన దాడుల తర్వాత, తమ అణు కేంద్రాలను తనిఖీ చేయడానికి ఇరాన్ నిరాకరించడం ఈ వివాదాన్ని మరింత రాజేసింది. అణు పర్యవేక్షక సంస్థ (IAEA) కూడా ఇరాన్ తీరుపై ఆందోళన వ్యక్తం చేస్తోంది. మొత్తానికి, అగ్రరాజ్యం అమెరికా తీసుకునే తదుపరి నిర్ణయంపైనే మధ్యప్రాచ్య శాంతి ఆధారపడి ఉంది.
