ప్రపంచ దేశాలన్నీ తిరుగుతూ, అక్కడి విశేషాలను తన వీడియోల ద్వారా పంచుకుంటూ గుర్తింపు తెచ్చుకున్న ప్రముఖ యూట్యూబర్ ‘నా అన్వేషణ’ అన్వేష్ చిక్కుల్లో పడ్డాడు. సోషల్ మీడియా వేదికగా హిందూ దేవతలపై, భారతీయ సంస్కృతిపై అనుచిత వ్యాఖ్యలు చేశారన్న ఆరోపణలతో పంజాగుట్ట పోలీసులు ఆయనపై తాజాగా లుకౌట్ నోటీసులు జారీ చేశారు. గత కొంతకాలంగా వివాదాలకు కేరాఫ్ అడ్రస్గా మారిన అన్వేష్ను దేశానికి రప్పించేందుకు పోలీసులు ఈ దిశగా చర్యలు చేపట్టారు.
అసలు వివాదం ఎక్కడ మొదలైందంటే.. ఓ సినిమా ఈవెంట్లో మహిళల వస్త్రధారణపై నటుడు శివాజీ చేసిన వ్యాఖ్యలను అన్వేష్ తప్పుబట్టారు. అయితే, ఆ క్రమంలో ఆయన చేసిన విమర్శలు కాస్తా హిందూ దేవుళ్లపై అసభ్యకరమైన పదజాలం వాడే వరకు వెళ్లాయి. దీనిపై హిందూ సంఘాలు, పలువురు నెటిజన్లు తీవ్ర ఆగ్రహం వ్యక్తం చేశారు. నటి కరాటే కళ్యాణి పంజాగుట్ట పోలీస్ స్టేషన్లో ఫిర్యాదు చేయడంతో గత ఏడాదిలోనే ఆయనపై కేసు నమోదైంది. అప్పటి నుంచి విదేశాల్లోనే ఉంటున్న అన్వేష్ను పట్టుకునేందుకు పోలీసులు వేట సాగిస్తున్నారు.
ఈ కేసులో భాగంగా పోలీసులు మరో కీలక అడుగు వేశారు. అన్వేష్కు సంబంధించిన యూట్యూబ్ ఛానెల్, ఇన్స్టాగ్రామ్ అకౌంట్లను పూర్తిగా బ్లాక్ చేయాలని కోరుతూ గూగుల్, మెటా సంస్థలకు లేఖలు రాయాలని నిర్ణయించారు. ఇప్పటికే ఆయన ఇన్స్టాగ్రామ్ అకౌంట్ కనిపించకుండా పోగా, అది పోలీసుల చొరవ వల్లే జరిగిందన్న చర్చ నడుస్తోంది. అయితే, అన్వేష్ మాత్రం తన పాస్పోర్ట్ పని కోసం తానే అకౌంట్ డీయాక్టివేట్ చేశానని, తనకు మరో అకౌంట్ ఉందని చెబుతూ వీడియో విడుదల చేయడం గమనార్హం.
ఒకప్పుడు అన్వేష్ వీడియోలను ఇష్టపడి ఫాలో అయిన లక్షలాది మంది నెటిజన్లు, ఇప్పుడు ఆయన చేస్తున్న వివాదాస్పద వ్యాఖ్యలతో దూరమవుతున్నారు. సోషల్ మీడియాలో ఆయన సబ్స్క్రైబర్లు, ఫాలోవర్ల సంఖ్య క్రమంగా తగ్గుతోంది. విదేశాల్లో ఉంటూ దేశ ప్రతిష్టను, మతపరమైన మనోభావాలను కించపరచడం సరికాదని మెజారిటీ నెటిజన్లు అభిప్రాయపడుతున్నారు. కరాటే కళ్యాణి సైతం స్పందిస్తూ, అన్వేష్ను చట్టం ముందు నిలబెట్టే వరకు తన పోరాటం ఆపనని స్పష్టం చేశారు.
ప్రస్తుతం లుకౌట్ నోటీసులు జారీ కావడంతో, అన్వేష్ ఏదైనా ఎయిర్పోర్ట్లో పట్టుబడే అవకాశం ఉంది. పోలీసులు సాంకేతిక ఆధారాలను సేకరిస్తూ ఆయన ఎక్కడ ఉన్నాడనే విషయాన్ని కనిపెట్టే ప్రయత్నం చేస్తున్నారు. విదేశాల నుంచి ఆయనను డిపోర్ట్ చేయించే అవకాశం కూడా లేకపోలేదు. ఈ పరిణామాలు ఇప్పుడు సోషల్ మీడియా సర్కిల్స్లో పెను దుమారం రేపుతున్నాయి. ఒక యాత్రికుడిగా మొదలై, అనవసర వ్యాఖ్యలతో అన్వేష్ తన కెరీర్ను ప్రమాదంలో పడేసుకున్నారనే వాదనలు వినిపిస్తున్నాయి.
