తెలంగాణ రాష్ట్రంలో శాంతిభద్రతల పరిరక్షణను మరింత పటిష్టం చేసేందుకు అదనపు ఐపీఎస్ అధికారులను కేటాయించాలని ముఖ్యమంత్రి రేవంత్ రెడ్డి కేంద్ర ప్రభుత్వాన్ని కోరారు. బుధవారం దేశ రాజధాని ఢిల్లీలో కేంద్ర హోంమంత్రి అమిత్ షాతో ఆయన సమావేశమయ్యారు. ఈ సందర్భంగా రాష్ట్రానికి సంబంధించిన పలు కీలక అంశాలపై చర్చించారు. ముఖ్యంగా రాష్ట్రం ఏర్పడిన తర్వాత పెరిగిన జనాభా, కొత్త జిల్లాల ఏర్పాటు నేపథ్యంలో పోలీస్ యంత్రాంగంపై పనిభారం పెరిగిందని, దానికి తగ్గట్లుగా అధికారుల సంఖ్యను పెంచాల్సిన అవసరం ఉందని సీఎం వివరించారు.
రాష్ట్రంలో ప్రస్తుతం ఉన్న 83 ఐపీఎస్ పోస్టుల సంఖ్యను 105కు పెంచాలని రేవంత్ రెడ్డి కోరారు. 2016 తర్వాత జరిగిన క్యాడర్ రివ్యూలో కేవలం ఏడు పోస్టులు మాత్రమే పెంచారని, ఇది ఏమాత్రం సరిపోదని ఆయన గుర్తు చేశారు. మారుతున్న కాలానికి అనుగుణంగా సైబర్ క్రైమ్, డ్రగ్స్ నియంత్రణ వంటి సవాళ్లను ఎదుర్కోవడానికి సమర్థులైన అధికారులు అవసరమని పేర్కొన్నారు. అలాగే 2026లో జరగాల్సిన తదుపరి క్యాడర్ రివ్యూను ఎటువంటి ఆలస్యం లేకుండా సకాలంలో పూర్తి చేయాలని అమిత్ షాకు విజ్ఞప్తి చేశారు.
హైదరాబాద్తో పాటు సైబరాబాద్, మల్కాజిగిరి కమిషనరేట్ల పరిధి విస్తరించిందని, భవిష్యత్తులో రాబోయే ‘ఫ్యూచర్ సిటీ’ కోసం ప్రత్యేక కమిషనరేట్ ఏర్పాటు చేయాల్సి ఉంటుందని ముఖ్యమంత్రి వివరించారు. రాజధాని ప్రాంతంలో పెరుగుతున్న జనాభాకు తగినట్లుగా పోలీసింగ్ వ్యవస్థను ఆధునీకరించాలని చెప్పారు. కేవలం శాంతిభద్రతలే కాకుండా, వైట్ కాలర్ నేరాలు అంతర్జాతీయ స్థాయిలో జరుగుతున్న ఆర్థిక నేరాలను అరికట్టడానికి అదనపు బలగాలు, అధికారుల అవసరం ఉందని ఆయన కేంద్ర మంత్రికి వివరించారు.
రాష్ట్రంలో మావోయిస్టుల కార్యకలాపాలు తగ్గుముఖం పట్టాయని, గత రెండేళ్లలో సుమారు 591 మంది మావోయిస్టులు లొంగిపోయి జనజీవన స్రవంతిలో కలిశారని సీఎం రేవంత్ వెల్లడించారు. వీరిలో పలువురు సీనియర్ నాయకులు కూడా ఉన్నారని, వారికి ప్రభుత్వ నిబంధనల ప్రకారం పునరావాసం కల్పిస్తున్నామని తెలిపారు. మావోయిస్టు ప్రభావిత ప్రాంతాల్లో అభివృద్ధి పనులను వేగవంతం చేసేందుకు కేంద్రం నుంచి ప్రత్యేక నిధులు కేటాయించాలని ఆయన కోరారు. వెనుకబడిన ప్రాంతాల అభివృద్ధికి సహాయం అందించాలని విజ్ఞప్తి చేశారు.
ఈ కీలక సమావేశంలో ముఖ్యమంత్రి వెంట ప్రభుత్వ ప్రధాన కార్యదర్శి వి. శేషాద్రి, రాష్ట్ర డీజీపీ బి. శివధర్ రెడ్డి, ఇంటెలిజెన్స్ అదనపు డీజీ విజయ్ కుమార్ తదితరులు పాల్గొన్నారు. తెలంగాణ అభివృద్ధికి భద్రతకు సంబంధించి రాష్ట్ర ప్రభుత్వం తీసుకుంటున్న చర్యలను అమిత్ షాకు వారు వివరించారు. రాష్ట్ర విన్నపాలపై కేంద్ర మంత్రి సానుకూలంగా స్పందించారని, త్వరలోనే సానుకూల నిర్ణయం వస్తుందని ఆశిస్తున్నట్లు సీఎం కార్యాలయ వర్గాలు తెలిపాయి.
